Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Fjala përshëndetëse e Kryetarit të Bashkisë Skrapar z. Adriatik Mema


Të nderuar anëtarë të Këshillit të Bashkisë,

I nderuar Ministër Klosi,

I nderuar Zoti Shameti, Deputet i Kuvendit të Shqipërisë,

E nderuar Zonja Kuko, Zëvendësministre e Brendshme,

I nderuar Zoti Hodaj, Zëvendësministër i Brendshëm,

E nderuar Zonja Prefekte e Qarkut Berat,

Të nderuar Zonja dhe  Zotërinj,

Ndihem jashtëzakonisht i nderuar dhe i privilegjuar t’ju drejtohem sot me këtë fjalë përshëndetëse, në cilësinë e Kryetarit të Bashkisë.

Që në krye të herës, dëshiroj të shpreh falënderimet dhe mirënjohjen time të thellë për të gjithë qytetarët e Skraparit, për mënyrën se si e pritën kandidaturën time, si dhe besimin që më dhanë, duke më votuar në 30 Qershor.

Me pjesëmarrjen e tyre në këtë proces zgjedhor, ata konfirmuan vlerat dhe qytetarinë, që i ka karakterizuar gjithmonë.

Të jem i sinqertë, të jesh Kryetar i një Bashkie, nuk është diçka që i ndodh çdo kujt dhe nuk ndodh shpesh. Unë  kam dashur të isha i tillë. Për këtë arsye, si Kryetari i shtatë i Bashkisë, qëndroj sot përpara jush dhe përpara çdo qytetari të Skraparit me respektin dhe përuljen që secili prej tyre meriton.

Besimi që na është dhënë, mua si kryetar,  por edhe ju si këshilltarë, dhe përmes jush Partisë Socialiste, nuk duhet konsideruar asnjëherë, thjesht si një dhuratë. Përkundrazi, të gjithë ata që na kanë votuar na kanë deleguar, për një kohë të caktuar, të drejtën e përfaqësimit.

Është detyrimi ynë t’i përfaqësojmë ata, por edhe ata të cilat nuk na kanë votuar, dhe t’ju shërbejmë me dinjitet dhe të ushtrojmë me përgjegjshmëri maksimale detyrat që na janë ngarkuar. Ne duhet të jemi të gjithë mirënjohës, por edhe të vendosur për të punuar shumë, për të provuar se besimi që na është dhënë ja ka vlejtur.

Ndaj, që sot, ne duhet të nisim një kapitull të ri, për ta ringritur Skraparin në lartësinë që meriton. Nga sot, Bashkia do të jetë e të gjithëve dhe në shërbim të të gjithëve, pa asnjë dallim. Ne nuk kemi aspak luksin të humbasim kohë. Duhet punë, punë dhe vetëm punë. Duhet të vlerësojmë arritjet, por edhe të jemi më ambiciozë për të bërë dhe arritur më shumë.

Në këtë moment, teksa ju shoh të gjithëve, mendoj se çfarë na pret përpara dhe se çfarë mund të bëjmë të gjithë së bashku. Ne kemi shumë sfida përpara, të cilat unë nuk mund t’i përballoj i vetëm, as edhe brenda një dite.

Ndaj, jam më se i vendosur të bashkëpunoj me këshillin e ri që u konstitua sot, si dhe me të gjithë ata që duan një Skrapar më të mirë dhe më të përparuar. Ajo që premtoj sot, është të vendos respektin për këdo në qendër të punës time, t’ju informoj ju si anëtarë të këshillit, por dhe të dëgjoj me vëmendje idetë tuaja.

Nuk jemi këtu për të festuar fitoren politike timen si individ, as tuajën si anëtarë të këshillit, por për të dëshmuar se dimë të ruajmë dhe çojmë përpara vlerat e këtij qyteti, vlerat e të gjithë Skraparit.

Ne marrim drejtimin e Bashkisë pas 12 vjetësh qeverisje nga një parti tjetër. Ndaj, kemi shansin e artë, të dëshmojmë se ne dimë t’i bëjmë gjerat më mirë, dimë t’i menaxhojmë financat publike më mirë, në funksion të prioriteteve zhvillimore që do të paraqesim shumë shpejt, të cilat do të sjellin një perspektivë të qartë për komunitetin.

Me mbështetjen e qeverisë, do të bëjmë të mundur prezantimin e një fryme transformuese me impakt të dukshëm në Skrapar. Bashkia e Skraparit do të marrë një dimension krejt të ri, me vizion të qartë drejt së ardhmes, për ta bërë Skraparin të mirë jetueshëm për banorët e tij, por gjithnjë e më shumë të vizitueshëm për këdo që dëshirojnë të shijojnë bukuritë e tij.

Zonja dhe zotërinj,

Sa thashë më sipër, nuk do të thotë se ne po nisim gjithçka nga pika zero. Absolutisht jo. Unë jam vlerësues për shërbimin dhe punën që kanë bërë para rendësit e mi në këtë post të nderuar.

Ndaj, dua ta shfrytëzoj këtë mundësi, të shpreh falënderimet e mija të sinqerta për të gjithë ata, pa përjashtim, duke filluar nga zoti Fitim Nurellari, z. Luan Bregu, z. Ylli Mekollari, z. Avdyl Arra, i ndjeri z. Lefter Lame dhe së fundi z. Nesim Spahiu.

Do të doja shumë, që ky i fundit të ishte sot i pranishëm në këtë ceremoni. Prania e tij, do ta bënte më të plotë një event të tillë. Pavarësisht se kjo gjë, nuk cënon aspak dinjitetin dhe solmentitetin e një ceremonie të tillë. Kjo është tërësisht në dorën tonë.

Së fundi, dëshiroj të shpreh edhe diçka, që mund të tingëllojë paksa ndryshe, por që e quaj normale në raste të tilla.

Në këtë sallë, unë kam prindërit e mi, në moshë të tretë dhe vëllain tim, i cili ka qenë më mua në çdo moment të kësaj fushate zgjedhore. Ata më kanë mbështetur shumë. Dua t’ju them se, ashtu sikurse kam bërë në çdo hap të karrierës time të deritanishme, do t’ju bëj edhe më krenarë nga kjo detyrë e lartë që po marr sot.

Janë sot me mua edhe më të dashurit që unë kam, ime shoqe, Violeta së bashku me dy vajzat tona, Albora dhe Gleda, të cilat që kurse ishin të vogla thoshin me zë të lartë, “unë jam nga Skrapari”. Ato më kanë mbështetur, deri në sakrificë, në çdo detyrë që unë kam ushtruar. Pa mbështetjen tuaj nuk do isha këtu sot.

Unë kandidova pse e dua shumë Skraparin, ndaj jam i vendosur të bëj gjithçka të mundur për të mirën dhe progresin e këtij komuniteti të mrekullueshëm, i cili meriton shumë më tepër.

Zoti më ndihmoftë!

Ju faleminderit të gjithëve.

Njoftim – Bashkia Skrapar Njofton Taksapaguesit

Të nderuar qytetarë!

Bashkia Skrapar për t’u ardhur në ndihmë qytetarëve,  ka vënë  në dipozicion  një punonjës nga ora  08:00 deri në orën 15:00, çdo ditë pune, nga e hëna në të premte, në sektorin e Tatim-Taksave, për:

– Njohjen me Detyrimet Tatimore të Vitit 2019.

– Paisjen me Njoftim-Vlerësimi për Detyrimet e Vitit.

– Për gjëndjen dhe llogaritjen e detyrimeve të prapambetura (për ata që kanë).

– Për kryerjen e  pagesës së detyrimit.

– Për çdo informacion tjetër që ju nevojitet lidhur me Taksat dhe Tarifat Vendore.

Për vitin 2019, nuk ka ndryshime në  numrin dhe nivelin e taksave dhe tarifave vendore, me përjashtimin të Taksës së Ndërtesës (apartament banimi) ku ka ndryshuar metodologjia e llogaritjes, nga lekë për m² në tarifën 0.05% mbi vlerën e ndërtesës, në zbatim të ligjit Nr.9632, datë 31.10.2006 “Për Sistemin e Taksave Vendore”, i ndryshuar. Për një taksim të drejtë mbi taksën e ndërtesës, ju duhet të paraqitni një  fotokopje të Çertifikatës së Pronësisë për apartamentin e banimit.

Qytetarët, me detyrime të prapambetura, duhet të paraqiten sa më parë, për t’u njohur me  llojin e detyrimit, vitin e krijimit, si dhe arkëtimin e tyre menjëherë. Qytetarët në pamundësi financiare për arkëtimin e menjëhershëm të tyre, mund të bëjnë kërkesë për të lidhur marrëveshje për pagesën me këste sipas ligjit “Për Proçedurat Tatimore në Republikën e Shqipërisë”. Në çdo rast të kundërt, do të fillojmë proçedurat për mbledhjen me forcë të detyrimeve, si:
– Bllokim të llogarisë bankare.
– Vendosje e masës së sigurisë mbi pasurinë e paluajtëshme dhe të luajtëshme,
– Vendosje e sekuestros së pasurisë etj, të parashikuara këto në Nenin 90, dhe në vijim të ligjit për proçedurat tatimore i sipër cituar.
Kamatë vonesa do të vazhdojë të llogaritet deri në pagesën e plotë të detyrimit.

Shpresojmë të kemi  mirëkuptimin tuaj!

Ju faleminderit!

 

Bëhu Pronar i Tokës Tënde!

Nëse nuk jeni të pajisur me tapinë quajtur ndryshe AMTP Akti i Marrjes së Tokës Bujqësore në Pronësi, deri në datën 31.12.2018 ju mund t’a bëni këtë proçedurë “Për t’u bërë pronar i tokës tënde” FALAS mjafton që:
– Të paraqiteni në Njësinë tuaj Administrative apo Bashki
– Të bëni kërkesën
– Të paraqisni Planvendosjen e Ngastrës / Ngastrave
– Të paraqisni një çertifikatë familjare sipas rregjistrit të gjendjes suaj civile të 01.08.1991 (për territoret e ish-kooperativave) apo të gjendjes suaj civile 01.08.1991( me ndryshime deri në 01.10.1992 për ish-ndërmarrjet bujqësore )
– Paraqisni nëse dispononi AMTP në përdorim) për territoret e ish-ndërmarrjet bujqësore
– Dokumentacion që vërtetoni se jeni përfitues me tokë si rezultat i lëvizjes nga qëndra juaj e banimit me VKM të veçanta)

Në rast se ju, keni përfituar tokë bujqësore si bashkëthemelues të ish-Ndërmarrjeve Bujqësore ju nevojitet:
* Kërkesa
* Dokumentacion Kadastral, Hipotekor, Arkivor apo Gjyqësor që provon pronësinë mbi tokën
* Plan vendosje e ngastrës apo ngastrave
* Çertifikatë familjare në momentin e dorëzimit të tokës bujqësore e shoqëruar me aktet e trashëgimisë
* AMT në përdorim (nëse e dispononi)

Përfitimet tuaja nga ky proçes, janë të shumta prandaj përfitoni nga këto mundësi që vlejnë për kryerjen e proçesit të plotësimit të dosjes FALAS deri në 31 Dhjetor 2018