Lajme

5 Shtatori – Dita e çlirimit të Skraparit

U përkujtua sot 79 vjetori i çlirimit të Skraparit. Bashkia Skrapar, në bashkëpunim me Organizatën e Veteranëve të LANÇ të Skraparit, organizoi sot një ceremoni përkujtimore në Varrezat e Dëshmorëve të Luftës Anti Fashiste Nacional – Çlirimtare. Të pranishëm në këtë ceremoni ishin Kryetari i Bashkisë, drejtues të saj, përfaqësues të Prefekturës, veteranë, pasardhës të familjeve të dëshmorëve dhe qytetarë të shumtë. Të pranishmit vendosën kurora dhe buqeta me lule në nderim të veprës së pavdekshme të atyre që dhanë jetën për lirinë e Shqipërisë. Në fjalën e tij përpara të pranishmëve, Kryetari i Bashkisë z. Adriatik Mema solli kontributin e shkëlqyer të bijve dhe bijave të Skraparit në Luftën Antifashiste Nacionalçlirimtare, jo vetëm për çlirimin e Skraparit, por të gjithë Shqipërisë. Vepra dhe sakrificat e tyre, tha ndër të tjera z. Mema, do të nderohen përjetësisht. Skrapari është krenar për historinë dhe kontributin e çmuar në luftën për çlirimin e vendit. Në vijim, z. Mema theksoi nevojën për të shndërruar gjithë ansamblin ku sot janë vendosur varrezat e dëshmorëve dhe muzeu i rrethit në një zonë e cila duhet të jetë në lartësinë e veprës së dëshmorëve që prehen në këto varreza. Për këtë, shtoi ai, Bashkia në bashkëpunim me aktorë të tjerë, do të bëjë të mundur hartimin e një projekti i cili synon rikonceptimin e gjithë kësaj hapësire. Viti që vjen, shtoi z. Mema, shënon edhe 80 vjetorin e çlirimit të Skraparit, ndaj dhe Bashkia së bashku me organizatën e veteranëve të LANÇ, do të fillojë sa me parë përgatitjet për festimin me madhështi të këtij përvjetori.

Nderim dhe mirënjohje për jetë dëshmorëve të Skraparit.

Nis rehabilitimi i rruges se Prishtes

Nis rehabilitimi i rrugës së Prishtës, shëmbull i shkëlqyer i bashkepunimit të Bashkisë me komunitetin

Solidariteti shoqëror duket se po rikthehet në Shqipëri.
Banorët e fshatrave Prishtë, Rehovicë dhe Dorës në Bashkinë e Skraparit, po e kthejnë në realitet atë që autoritetet shtetërore e kanë premtuar, por nuk e realizuan gjatë 30 viteve të tranzicionit të tejzgjatur që po kalon Shqipëria pas rënies së regjimit komunist. Ata janë bashkuar dhe po punojnë për rindërtimin e rrugës Çorovodë- Prishtë.
Prej mijëra vitesh, kjo rrugë ka qenë dëshmitare e kalimit të udhëtarëve, karvaneve të mallrave, pelegrinëve bektashinj e luftëtarëve në kohëra të ndryshme.
Rruga ka lidhur zonën me disa prej qendrave të rëndësishme të jugut si Përmetin, Gjirokastrën dhe Beratin, dhe siç shprehen banorët ka qenë dëshmitare e jetës, gëzimeve dhe hidhërimeve të tyre.
Ndoshta është kjo arsyeja që banorët e Prishtës, Rehovicës dhe Dorës e konsiderojnë atë si një monument dhe duan të rikthejnë lavdinë e saj.
Banorët vendas, por më së shumti të banorë të larguar nga këto fshatra, kanë bërë të mundur mbledhjen e një fondi të konsiderueshëm prej 2.6 mln lekësh për të rikthyer jetën dhe historinë e rrugës.

Banorët kanë siguriuar 750 metër kub material rërë bituminoze dhe 80 metër kub çakull, ndërsa Bashkia e Skraparit ka vendosur në dispozicion punonjës të ndërmarrjes së shërbimit dhe mjete të rënda.
Prej tri ditësh rruga Çorovodë- Prishtë, 8.5 kilometra e gjatë është kthyer në një kantier të madh ndërtimi. Në gjithë gjatësinë e saj po kryhen punime në hapjen e kanaleve kullues, shtrimin dhe nivelimin e çakullit si dhe hedhjen e rërës bituminoze.
Nisma e banorëve të tri fshatrave Prishtë, Rehovicë dhe Dorës, është një nismë e rrallë në Shqipëri për vitet që po jetojmë. Ajo po përshëndetet nga mjaftë dashamirës dhe sidomos nga banorët emigrantë të zonës. Shumë prej tyre që kanë mbërritur për pushimet verore në vendlindje, janë zotuar se do të ndihmojnë që rruga të vazhdojë më tej.

Rruga e cila nis nga ura e Blezënckës mbi Kanionin e famshëm të Osumit, lidh edhe 16 fshatra të tjerë të Bashkisë së Përmetit, Këlcyrës dhe Beratit. Në pak kilometra të saj gjen asete dhe monumente të rëndësishme arkeologjike, fetare dhe natyrore.
Në inisiativen e tyre, banorët e kësaj zone synojnë të përfshijnë jo vetëm Bashkinë e Skraparit, por edhe Ministrinë e energjisë dhe Infrastrukturës si dhe Ministrinë e Turizmit dhe Mjedisit. Ata u kanë bërë thirrje titullarëve më të lartë të këtyre dikastereve që të bashkohen në këtë nismë për ti ndihmuar në finalizimin e shtrimit të rrugës.
Banorët po punojnë që rruga të jetë gati më 18 Gusht, kur ata dhe banorët e zonave fqinje dhe me gjerë të festojnë tek Teqeja e Prishtës si çdo vit çeljen e Peligrinazhit në Malin e Tomorrit.

Hapja e Thirrjes VI të Programit Kombëtar të Praktikave të Punës

PROGRAMI KOMBËTAR I PRAKTIKAVE TË PUNËS, THIRRJA VI

Në zbatim të Vendimit nr. 395, datë 29.04.2015, të Këshillit të Ministrave “Për miratimin e Programit Kombëtar të Praktikave të Punës në Administratën Shtetërore dhe Institucionet e tjera Publike”, i ndryshuar, Ministria e Arsimit, Sportit dhe Rinisë shpall thirrjen e gjashtë të “Programit Kombëtar të Praktikave të Punës”.

Informacionin rreth Programit, institucionet pjesëmarrëse, numrin e praktikantëve dhe profilet studimore të kërkuara mund t’i gjeni në linkun: http://praktika.arsimi.gov.al, nga ku mund të kryeni edhe aplikimin online, pasi të klikoni në dritaren “Aplikimi”.

Aplikimi është i hapur për të rinjtë, që përmbushin këto kritere:

Të jenë 21-26 vjeç;
Të kenë përfunduar minimalisht ciklin e parë të studimeve “Bachelor”;
Të mos kenë qenë pjesë e programit gjatë thirrjeve të mëparshme .

Të rinjtë e interesuar duhet të aplikojnë vetëm në një institucion të caktuar, në të kundërt aplikimi i tyre nuk do të merret në konsideratë.

Dokumentet që duhet të ngarkojnë aplikantët janë :

a- CV (jetëshkrimin) e aplikantit;

b- Letra e motivimit

Afati për aplikim është nga data 9 Korrik deri më datë 31 Korrik 2021.

Pas mbylljes së aplikimeve, institucionet përkatëse do të lajmërojnë nëpërmjet postës elektronike të përzgjedhurit për të filluar praktikën 3- mujore, në periudhën 16 gusht 2021 – 16 nëntor 2021.

Pjesëmarrësit do të përfshihen në një përvojë pune, në ndërveprim me profesionistët në administratën publike, institucionet e tjera publike, njësitë e vetëqeverisjes vendore, dhe shoqëritë tregtare, me qëllim përfitimin e njohurive praktike, pasurimin e jetëshkrimit të tyre, zgjerimin e rrjetit të kontakteve, aftësimin e mëtejshëm për punën në grup, përshtatshmërinë me ambientin e punës, ndërmarrjen e iniciativave etj..

Të gjithë praktikantët që e përfundojnë praktikën me sukses pajisen me certifikatë lëshuar nga Ministria e Arsimit, Sportit dhe Rinisë dhe Deparamenti i Administratës Publike dhe periudha tre – mujore e praktikës njihet si përvojë pune nga Departamenti i Administratës Publike.

Rehabilitimi i segmentit rrugor Potom-Backë

Bashkia Skrapar ka bërë të mundur së fundmi rehabilitimin e rrugës Potom-Backë. Punimet sistemuese dhe mirëmbajtëse në këtë segment përkojnë edhe me festimet që besimtarët Bektashianë të ardhur nga krahina të ndryshme të vendit zhvillojnë në Teqenë e njohur të Backës. Është kjo, si në çdo rast festimesh të tilla, një mënyrë që Bashkia Skrapar investohet, përmes Ndërmarrjes së Shërbimeve Publike, për të krijuar kushte sa më të mira për besimtarët Bektashianë. Një falënderim i veçantë për punonjësit e Ndërmarrjes së Shërbimeve Publike, punëtorët, manovratorët, drejtuesit e mjeteve, si dhe Administratorin e Njësisë Administrative Potom dhe komunitetin për bashkëpunimin e shkëlqyer.

Ceremonia e dhënies së titullit “Qytetar Nderi i Skraparit” (pas vdekjes) zotit Bashkim Caka

Në sallën e mbledhjeve të Këshillit të Bashkisë Skrapar, u zhvillua në datën 20.06.2021, ceremonia e dhënies së titullit “Qytetar Nderi i Skraparit” (pas vdekjes) për z. Bashkim Caka.

Në këtë ceremoni merrnin pjesë familjarë të z. Caka, anëtarë të Këshillit të Bashkisë, deputetë të Kuvendit të Shqipërisë, zëvendëskryetari i Gjykatës së Lartë, z. Sokol Sadushi, gjyqtarë, qytetarë të Skraparit etj. Ceremoninë e hapi Kryetari i Bashkisë, i cili në fjalën e tij vlerësoi figurën e z. Bashkim Caka, duke theksuar se “ai ishte një gjyqtar me kurajë dhe integritet të lartë, model jo vetëm për komunitetin e atyre që janë pjesë e sistemit të drejtësisë, por edhe me tej, i cili asnjëherë dhe në asnjë rast, nuk u influencua nga asgjë tjetër, përveçse nga ligji dhe vetëm ligji. Gjithçka arriti në jetë ishte vetëm me punë, pasion, përkushtim dhe profesionalizëm, ndaj edhe asnjëherë nuk i mungoi respekti i kolegëve dhe publikut. Ishin cilësitë që ai mishëronte të cilat bënë që Bashkimi të qëndronte gjithmonë në lartësinë e misionit të gjyqtarit, pavarësisht vështirësive që sistemi i drejtësisë ka shfaqur në këto vite demokraci. Drejtësia në Shqipëri ka nevojë për shembuj dhe modele si ai i Bashkim Cakës.”

Titulli “Qytetar Nderi i Skraparit“ iu dorëzua familjarëve nga zonja Edlira Shkëmbi, kryetare e Këshillit të Bashkisë Skrapar. Ceremoninë e përshëndetën edhe të ftuar si z.Fatmir Xhafaj, z.Sokol Sadushi, z. Nasip Naço, z.Spartak Braho, z. Sadik Xhaferraj. Po ashtu, përmes mesazheve apo letrave të dërguara, ceremonia u përshëndet edhe nga z. Francesk Ganaj, z. Maksim Haxhija, z.Muharrem Kushe, znj. Vasilika Hysi, z. Fehmi Abdiu.