Lajme

Në kuadër të bashkëpunimit me institucione shtetërore qendrore dhe lokale, në funksion të njohjes së veprimtarisë së tyre dhe të shkëmbimit të eksperiencës, një grup i Kursit të Lartë të Oficerit (KLO) të Forcave të Armatosura, zhvilloi një vizitë në Bashkinë Skrapar. Në përbërje të këtij grupi ishin oficerë të forcave të ndryshme (Tokësore, Ajrore dhe Detare), oficerë të Forcës së Sigurisë së Kosovës si dhe stafi pedagogjik i Akademisë së Mbrojtjes.

Kursantët u pritën në një takim të veçantë nga Kryetari i Bashkisë, zoti Adriatik Mema, i cili në fjalën e tij vlerësoi rolin e Forcave të Armatosura, të cilat përveç misionit të tyre kryesor, janë angazhuar intensivisht në përballimin e emergjencave civile apo fatkeqësive natyrore. Në këtë kontekst, ai nënvizoi edhe rastet e fundit të bashkëpunimit që FA kanë pasur me Bashkinë Skrapar.

Takimi vijoi më pas me një prezantim të përgatitur nga Bashkia, nëpërmjet të cilit të pranishmit u njohën me organizimin dhe funksionimin e Bashkisë si njësi e qeverisjes vendore, strukturën organizative  të saj, njësitë administrative në përbërje të bashkisë, çështje që kanë të bëjnë me buxhetin e bashkisë, taksat dhe tarifat vendore, investimet e realizuara vitet e fundit, përballimin e emergjencave apo fatkeqësive natyrore, etj.

Ky prezantim u ndoq me shumë interes nga kursantët, të cilët adresuan edhe pyetje konkrete që kishin të bënin me aspekte të tilla si: kapacitetet e bashkisë në mbledhjen e të ardhurave, planet e bashkisë lidhur me promovimin e turizmit dhe mbrojtjes së mjedisit, kapacitetet lidhur me shërbimin e mbrojtjes nga zjarri dhe shpëtimit, bashkëpunimin me organe të tjera sa i takon përballimit të emergjencave civile, etj.

Pas takimit në Bashki, kursantët vizituan kanionet e Osumit, si destinacioni kryesor turistik në Skrapar. Duke shpresuar që kursantët të kenë kaluar një ditë interesante, Bashkia Skrapar shpreh vlerësimin e saj për këtë vizitë shumë domethënëse  të përfaqësuesve të Forcave të Armatosura.

Projekti i Ndërtimit të Ambienteve Rekreative & Restaurimi i Fasadave, në Lagjen “5 Shtatori” Çorovodë, i financuar nga IADSA (Konvertimi i Borxhit Italo-Shqiptar) transformon totalisht lagjen “5 Shatori”, duke e shndërruar këtë ambient në zonën më atraktive të saj. Bashkia Skrapar sapo ka përfunduar me sukses zbatimin e projektit, i cili ka ndikuar drejtpërsëdrejti në cilësinë e jetesës se këtij komuniteti.

Rehabilitimi i ambienteve të jashtme, krijimi i ambienteve moderne shlodhese dhe argëtuese për të gjitha moshat, mbjellja e pemëve dekorative, sipërfaqet e gjelbëruara dhe rikonstruksioni i fasadave të pallateve, ka ndikuar në ndërgjegjësimin e komunitetit qytetar rezident në këtë lagje por dhe atë të larguar, që të investojnë në banesat e tyre, pasi prona e tyre tashmë, nuk është më një pronë pa interes, por përkundrazi merr vlerë.

Banorët e kësaj lagjeje, janë shprehur shumë të kënaqur nga zbatimi i këtij projekti, dhe falënderojnë bashkinë, për seriozitetin dhe këmbënguljen në zbatimin e tij.

Nga ana e saj Bashkia Skrapar, shpreh mirënjohjen dhe falënderimin e veçantë, për donatorin e projektit IADSA dhe stafin e saj si një partner shumë serioz dhe shume i rëndësishëm, mbështetës i disa projekteve në bashki, me impakt të dukshëm dhe të prekshëm për banorët e Bashkisë Skrapar.

Në sallën e mbledhjeve, të Këshillit të Bashkisë Skrapar, u zhvillua  ceremonia e dhënies së Titullit “Qytetar Nderi” (pas vdekjes) Z. Mustafa Dervishi.

Në këtë ceremoni morën pjesë familjarë të Z. Dervishi, anëtarë të Këshillit të Bashkisë, deputeti i Kuvendit të Shqipërisë Z. Fadil Nasufi, specialistë  të bujqësisë, kolegë të Z.  Mustafa Dervishi, ish  Rektori i  Universitetit Bujqësor Kamëz, Prof. Dr. Bari Musabelliu, Prof. Dr. Sherif Bundo, Prof. Asoc. Dr  Hysen Binjaku,  qytetarë të Skraparit etj.

Ceremonia u hap nga Kryetari i Bashkisë Skrapar, Z. Adriatik  Mema, i cili, vlerësoi figurën e Z. Dervishi si,  “Përfaqësuesi më i denjë, i atij brezi agronomësh, të cilët vunë gjithë dijen e tyre, pavarësisht kushteve të vështira që ky profesion dikton;  punuan me pasion, përkushtim dhe bënë sakrifica të mëdha në funksion të zhvillimit bujqësor, jo vetëm në Skrapar,  por kudo ku u caktuan”. Më tej,  Z. Mema shtoi se tek, “Z. Mustafa bashkoheshin agronomi, specialisti me kualifikim të lartë, punonjësi kërkimor, drejtuesi vizionar, i përunjur dhe modest në çdo pozicion pune që shërbeu, si dhe qytetari e familjari model”.  Titulli “Qytetar Nderi i Skraparit”(pas vdekjes), iu dorëzua familjarëve nga Znj. Edlira Shkëmbi, Kryetare e Këshillit Bashkiak, Skrapar.

Ceremonia u bë edhe më e plotë në sajë të pjesëmarrjes dhe përshtypjeve që ndanë  të ftuarit me  të pranishmit, momente kujtimesh me shumë vlerë, nga puna dhe njohja që kanë patur  me Z. Dervishi.  Në fjalën e tyre të mbylljes, familjarët e Z.Mustafa Dervishi, shprehën vlerësimet dhe mirënjohjen e thellë, për këtë akt qytetar nga Bashkia Skrapar.

Ditën e sotme në mjediset e Ambasadës së Japonisë në Tiranë u zhvillua një ceremoni modeste gjatë së cilës u dhuruan 139 tituj librash, ne gjuhen angleze, për bibliotekën e qytetit të Çorovodës, në kuadër të projektit “Read Japan”.

Ky fond librash, vjen si një dhuratë e çmuar, për lexuesit, duke iu dhënë atyre mundësinë të njihen nga afër me kulturën, artin, letërsinë  dhe qytetërimin japonez, si pjesë  e rëndësishme e qytërimit botëror. Ambasadori i Japonisë, Sh. T. Z. Takada Mitsuyuki, në fjalën e tij pasi vlerësoi bashkëpunimin dhe partneritetin e vendosur me Bashkinë Skrapar, shprehu gatishmërinë për ta vazhduar këtë bashkëpunim me projekte konkrete në të ardhmen.

Në fjalën e tij, Kryetari i Bashkisë Skrapar z. Adriatik Mema, shprehu mirënjohjen për këtë donacion i cili mbart një simbolikë të veçantë, si dhe asistencën e dhënë nga qeveria Japoneze, duke ndihmuar dukshëm në rritjen e kapaciteteve logjistike sa i takon administrimit të mbetjeve urbane dhe pastërtisë në qytet. Të dy palët shprehën dëshirën për ta vazhduar, këtë bashkëpunim, në projekte të tjera të përbashkëta, në të ardhmen e afërt, në funksion të rritjes së standardit të shërbimeve ndaj komunitetit.

Në Ditën Botërore të Pastrimit, Bashkia Skrapar, strukturat vartëse të saj në  bashkëpunim me Projektin e Menaxhimit të Mbetjeve të Ngurta në Qarkun Berat, në kuadër të  nismës  “Qyteti më i Pastër”,  organizoi aksionin për pastrimin  e qytetit nga mbetjet.

Aksioni u zhvillua përgjatë rrugës së kanioneve të lumit Osum, sheshet  dhe hapësirat midis  pallateve të qytetit, si  dhe disa rrugë të brendshme në qytet.

Këtij aksioni iu  bashkuan vullnetarë të të gjitha moshave, të rinj e të reja të shkollës së mesme, si dhe  nxënës të shkollave 9 vjeçare, të cilët u bënë pjesë e pastrimit të territoreve ku  ata luajnë.

Bashkia Skrapar falenderon të gjithë ata që morën pjesë ne këtë ditë aksioni dhe njëkohësisht fton të gjithë qytetarët të kontribuojnë për një qytet sa më të pastër, për ta bërë atë gjithnjë e me shumë tërheqës për vizitorët vendas dhe të huaj.