Lajme

Në  kuadër të bashkëpunimit të frytshëm të vendosur tashmë me kompaninë Trans Adriatik Pipeline (TAP), Bashkia Skrapar ka përfituar së fundmi një automjet zjarrfikës me kalueshmëri të lartë, i cili i është bërë pjesë e kontingjentit të mjeteve në përdorim nga Sektori i Shërbimit të MZSH-së, duke rritur cilësisht kapacitetet e këtij shërbimi.

Sektori i Shërbimit të MZSH-së, do të ketë, kësisoj, mundësinë të përballojë më mirë situatat e emergjencës civile nga zjarret apo aksidentet. Ky automjet, i pajisur me të gjithë artikujt e nevojshëm të mbrojtjes dhe shpëtimit nga zjarri, ju dhurua Bashkisë Skrapar në prag të festave të fund vitit, në një ceremoni, në të cilën ishin të pranishëm  përfaqësues të  kompanisë Trans Adriatik Pipeline, Kryetari i Bashkisë z. Adriatik Mema, si dhe  të gjithë punonjësit e Sektorit të Shërbimit të MZSH-së.

Në vijim, sipas marrëveshjes së nënshkruar mes dy palëve, në pranverën e  këtij viti,  Bashkia Skrapar, do të përfitojë nga Kompania Trans Adriatik Pipeline edhe një mjet tjetër zjarrfikës, i përshtatshëm për  situata emergjente në zonat me reliev më të thyer malor.

Këto automjete i shtohen, kështu, fondit të asistencës së vazhdueshme që TAP ka dhënë për Bashkinë Skrapar ku, ndër më kryesoret, do të përmendnim: ndërtimin e kopshtit të ri në qendër të qytetit, ndërtimin e stacionit të pompave të ujësjellësit të qytetit, rikonstruksionin e shkollës 9-Vjecare Therepel, sistemim dhe asfaltim të disa segmenteve rrugore, ndriçimin e hyrjes së qytetit, etj.

Bashkia Skrapar, përfiton nga rasti t’i shpreh  Kompanisë Trans Adriatik Pipeline dhe stafit të saj menaxherial në Shqipëri, mirënjohjen e thellë për këtë ndihmë të çmuar,  në funksion  të sigurisë së jetës  dhe pronës së banorëve të saj.

Teksa i afrohemi pragut të ndërrimit të viteve, kam kënaqësinë t’ju përcjell të gjithë qytetarëve të Skraparit urimet e mija më të mira për vitin e ri 2022. Uroj që të gjithë të kalojnë një mbrëmje të gëzuar dhe të paharruar me familjet e tyre. Është nder dhe privilegj për mua, si kryetar i Bashkisë, të jem në shërbim të këtij komuniteti të mrekullueshëm. Stafi i Bashkisë dhe i gjithë Njësive Administrative, po ashtu, kanë qenë vazhdimisht në shërbim dhe në përgjigje të kërkesave të qytetarëve.
Pavarësisht, kushteve të krijuara nga pandemia, ky vit ka shënuar progres për komunitetin tonë. Ndër më kryesoret, do të përmendja: ndërtimin e ujësjellësit të ri të qytetit, punimet e të cilit kanë avancuar dukshëm, me synim përfundimin e tij në pranverën e vitit që vjen; ndërtimin e një qendre rekreative në lagjen 5 Shtatori, e cila përveç kushteve çlodhëse që ofron për të gjitha moshat, i ka ndryshuar rrënjësisht pamjen kësaj lagjeje; punime të tjera rehabilituese në brendësi të qytetit; punimet (ndonëse jo në ritmin e duhur) transformuese në qendër të qytetit, në kuadër të rilindjes urbane; punimet në proces për ndërtimin e ujësjellësve në fshatrat Gjerbës dhe Kakrukë; ndërhyrje të dukshme në mirëmbajtjen e infrastrukturës rrugore në disa fshatra, kjo, në disa raste, në bashkëpunim dhe me kontributin e vetë banorëve, etj.
Gjithë sa përmenda më sipër, por jo vetëm, janë inkurajim për ne për të pasur një vit të ri më ambicioz dhe me më shumë progres në të mirë të të gjithë komunitetit tonë.
Dhe ndërsa të gjithë përgatitemi për festën e ndërrimit të viteve, është momenti të kujtojmë dhe të urojmë një vit të mbarë për ato familje, të cilat, për shkak të pandemisë, kanë humbur këtë vit të dashurit e tyre.
Është momenti të urojmë, gjithashtu, ato familje që janë në nevojë, dhe të mendojmë dhe reflektojmë se si t’ju vijmë atyre më mirë në ndihmë, duke dëshmuar kësisoj solidaritetin dhe vlerat tona si komunitet.
Është momenti të urojmë pensionistët, veteranët dhe moshën e tretë si shenjë e vlerësimit, mirënjohjes dhe respektit që shoqëria duhet të tregojë për kontributin e tyre të çmuar, por edhe nevojës për më tepër kujdes ndaj kësaj shtrese.
Të urojmë të gjithë ata fermerë në çdo fshat të Skraparit, që me sakrifica dhe punë të palodhur ndërtojnë të ardhmen e fëmijëve dhe familjeve të tyre.
Të urojmë, ndoshta më të veçantët: fëmijët, nxënësit, studentët. Ata janë e ardhmja e këtij vendi, ndaj sa më shumë të përgatiten sot, aq më të aftë do të jenë për të përballuar sfidat e së nesërmes. Përmes tyre, një urim i përzemërt shkon edhe për edukatoret dhe mësuesit, të cilët me punën e tyre japin një kontribut të pazëvendësueshëm në progresin e shoqërisë.
Dua ta shfrytëzoj këtë mundësi të uroj të gjithë ata që për nga profesioni janë përherë në shërbim të qytetarëve: mjekët dhe infermierët, punonjësit e policisë dhe shërbimit zjarrfikës. Me punën tuaj keni fituar respektin e shoqërisë.
Të uroj po ashtu, punëtorët e ndërmarrjes së shërbimeve publike. Falë punës së tyre, shumë ambiente në brendësi të blloqeve të pallateve po ndryshojnë krejtësisht pamje. Është puna dhe kujdesi i tyre që kemi sot një qytet çdo ditë të pastër dhe të gjelbëruar.
Të uroj të gjithë ata që bëjnë biznes dhe t’ju uroj sa më shumë sukses në vitin që vjen. Me atë çka bëni, me vendet e punës që hapni, ju keni një rol të madh në zhvillimin e komunitetit. Bashkia do të jetë gjithmonë në mbështetjen tuaj dhe së bashku duhet të ndërtojmë një partneritet të shëndetshëm të orientuar drejt zhvillimit dhe progresit.
Të gjithë kemi nevojë për më shumë respekt, dashuri, mirësi, solidaritet dhe mbështetje ndaj njeri tjetrit. Vetëm kështu, do t’i japim kuptim dhe vlerë qytetare bashkëjetesës sonë, për ta bërë Skraparin një vend ku jetohet më mirë për të gjithë, pa përjashtuar askënd.
Edhe njëherë, ju uroj të gjithë banorëve dhe çdo familje, pjesëtarëve të tyre në emigracion, në veçanti vajzave, grave dhe nënave tona, të cilat kujdesen aq shumë për këtë mbrëmje feste: Gëzuar Vitin e Ri 2022. I uroj secilit shëndet, gëzime dhe lumturi në këtë vit që po troket.
GËZUAR!

Në prag të festave të fund vitit, Bashkia Skrapar në bashkëpunim me shkollat 9-vjeçare dhe të mesme organizoi një takim me nxënësit e dalluar të këtyre shkollave. Pjesëmarrës në këtë takim ishin 49 nxënës të zgjedhur nga të gjitha shkollat e Bashkisë, prindërit e tyre, drejtuesit e shkollave, mësues, anëtarë  të Këshillit të Bashkisë, etj.

Në fjalën përshëndetëse Kryetari i Bashkisë, u shpreh se: 

“Është kënaqësi e veçantë për mua të jem në këtë ceremoni shumë domethënëse, e cila bën bashkë nxënës të arsimit 9-vjecar dhe atij të mesëm, që pavarësisht klasës që ndjekin aktualisht, i bashkon një indikator: përformanca dhe rezultatet që kanë arritur këtë vit mësimor, por jo vetëm.

Është, po ashtu kënaqësi, të kemi sot këtu edhe prindërit e tyre, të cilët kanë vërtet një arsye të qenësishme të krenohen me atë çka ka arritur vajza apo djali i tyre në vitet e shkollës, si një premisë e sigurtë që ata të kenë, padyshim, një të ardhme më të mirë se ajo e prindërve të tyre sot. Në fund të fundit, kjo është dialektika e shoqërisë”.

Ju jeni e ardhmja e kësaj bote, ju do ta ndryshoni atë. Ju dhe bashkëmoshatarët tuaj do ta bëni Shqipërinë më të mirë, më të begatë”.

Ceremonia vijoi me tej me shpërndarjen e Certifikatave të Vlerësimit si dhe Certifikatës “E ardhmja e qytetit” për 12 nxënës me rezultate të shkëlqyera të  shkollave të mesme.

Të gjithë të pranishmit ndanë emocione të veçanta teksa nxënësve ju dorëzoheshin certifikatat si dhe dhuratat simbolike të përgatitura në këtë rast nga Bashkia Skrapar, duke shprehur vlerësim maksimal për këta fëmijë që i japin më shumë shkëlqim qytetit me rezultatet e tyre. Bashkia Skrapar falenderon Bankën Credins si një nga kontributorët për realizimin e kësaj ceremonie.

Regjistroni adresën e banimit në #eAlbania ose në zyrën e Gjendjes Civile pranë bashkisë. #Adresaime – Çelësi për të gjitha shërbimet publike!

Në sheshin qendror të qytetit të Çorovodës, u zhvillua sot ceremonia e dhënies së titullit “Qytetar Nderi i Skraparit” të Prof.dr Ajli Alushanit.

Dr. Ajli Alushani është një personalitet i njohur, i cili ka dhënë një kontribut të vyer në zhvillimin e mjekësisë, veçanërisht në fushën e kardiokirurgjisë në Shqipëri. Ai ka një karrierë të gjatë, e cila daton që nga viti 1963 dhe deri në ditë e sotme. Më shumë se gjysmë shekulli në shërbim të njerëzve, ditë edhe natë, duke u kujdesuar për ta, duke u dhënë atyre ndihmë dhe trajtim mjekësor. Në ceremoninë e sotme merrnin pjesë kolege të z. Ajli Alushani, akademike, qytetarë të shumtë të Skraparit. Ceremoninë e nderuan me pjesëmarrjen e tyre ish Presidenti z. Bamir Topi, Ministri i Brendshëm z. Bledar Çuçi, Deputeti i Skraparit z. Nasip Naco, drejtues të Prefekturës dhe drejtues të tjerë në nivel vendor.

Në fjalën e hapjes, Kryetari i Bashkisë, z. Adriatik Mema, bëri një përmbledhje të veprimtarisë profesionale, akademike dhe publike të Prof.dr Ajli Alushanit. Ndër të tjera, z. Mema u shpreh se, “një mjeku si ai, sado tituj e dekorata t’i akordosh, përsëri shoqëria i mbetet në borxh për atë çka dr. Ajliu i ka dhënë asaj gjatë gjithë jetës së tij”. Duke ju drejtuar, doktor Alushanit, ai shtoi: “Humanizmi dhe mirësia për ju nuk kanë qenë thjesht një akt apo një veprim, ato kanë qenë mënyra juaj e jetesës. Një jetë si e juaja, e jetuar plot ngjarje profesionale, sociale dhe publike, familjare dhe njerëzore, e jetuar për vete dhe për të tjerët, ja vlen ta jetosh”.

Ceremoninë e përshëndetën kolege të Prof.dr Ajli Alushanisi si: Prof.dr. Arben Baboci, Prof.dr. Veli Zogu, Prof.dr Dritan Shehu, ish Presidenti z. Bamir Topi, Ministri i Brendshëm z. Bledar Çuçi etj.

Me emocione të veçanta u përcoll fjala e Prof.dr Ajli Alushanit, i cili në momentin e marrjes së titullit u shpreh se: “Ky titull nuk është vetëm për mua por për të gjithë qytetarët e Skraparit, të cilët gjithmonë mbeten në zemrën time”. Z. Ajli Alushani falendroj Këshillin e Bashkisë Skrapar për titullin e nderit që ju dha dhe shtoi se pavarësisht moshës, si mjek ai do të bëjë gjithçka të mundur për t’ju shërbyer njerëzve që kanë nevojë për trajtim mjekësor. Kryetari i Bashkisë, gjen rastin të shprehë falenderimet e tij për të gjithë të pranishmit në këtë ceremoni, veçanërisht mjekët e ardhur nga Tirana, të cilët i dhanë kësaj ceremonie vlerë të veçantë.