Author: Eugen

Në praninë e Ministres së Turizmit dhe Mjedisit, znj. Mirela Kumbaro, përfaqësueses së GIZ, znj. Christine Koening, dita e djeshme shënoi përfundimin e punimeve në vend depozitimin e mbetjeve urbane në qytetin e Çorovodës. Punimet në këtë vend depozitim, të cilat u financuan nga qeveria Gjermane përmes GIZ, synojnë të sjellin atë në parametrat bashkëkohorë të administrimit të mbetjeve urbane. Në takimin e zhvilluar në Bashkinë Skrapar, kryetari i Bashkisë, z. Adriatik Mema, vlerësoi asistencën e GIZ si dhe mbështetjen e Ministrisë së Turizmit dhe Mjedisit për këtë projekt me shumë impakt për komunitetin. Në vijim, z. Mema u ndal tek prioritetet e Bashkisë Skrapar, sa i takon zhvillimit të turizmit, ruajtjes së mjedisit dhe administrimit të mbetjeve urbane dhe të ngurta. Ai vlerësoi, po ashtu, asistencën e dhënë në këtë drejtim edhe nga organizata apo institucione të tjera, si dhe koordinimin eficent të realizuar nga Bashkia, me qëllim maksimizimin e asistencës së ofruar dhe evitimin e mbivendosjeve të panevojshme. Synimi i Bashkisë është që ky vend depozitim të përdoret më pas, si vend transferimi i mbetjeve, në kuadër të projektit rajonal në nivel Qarku, për menaxhimin e përqendruar të mbetjeve urbane. Nga ana e saj, Ministrja Kumbaro, pasi vlerësoi punën e bërë deri tani nga Bashkia Skrapar, si dhe asistencën e GIZ, apo të donatorëve të tjerë, vuri theksin në atë çka përbën edhe sfidën më të madhe për të ardhmen: ndarjen e mbetjeve në burim, edukimin e banorëve për këtë gjë, përpjekjet që duhen bërë në vazhdimësi sa i takon reduktimit të mbetjeve, pastërtisë dhe mirëmbajtjes së destinacioneve turistike në Skrapar. Këto të fundit, sipas Ministres, duhet të jenë gjithmonë përparësi e punës së Bashkisë, me qëllim që vizitorët, vendas apo të huaj, të gjejnë atje pritshmëritë e tyre: një mjedis sa atraktiv aq edhe të pastër e të mirëmbajtur. Ruajtja e mjedisit në Malin e Tomorrit, (ndër destinacionet kryesore turistike) ishte po ashtu, një çështje tjetër e trajtuar nga Ministrja Kumbaro, kjo edhe për shkak të numrit gjithnjë e në rritje të vizitorëve në vendin e shenjtë, të cilëve lipset t’u krijohen kushtet dhe lehtësitë e nevojshme për të shijuar bukuritë e rralla që Mali i Tomorrit ofron për ta.

Në kuadër të projekteve IPA Greqi-Shqipëri 2014-2020, me financim nga BE, Bashkia Skrapar realizoi me sukses projektin “LESS Waste II”. Realizimi i këtij projekti, vjen si një risi, jo vetëm për Bashkinë Skrapar, por dhe në të gjithë vendin, pasi për herë të parë mbetjet organike do të kompostohen, duke gjeneruar pleh organik , i cili më pas do të përdoret për të mbuluar nevojat e Bashkisë, në sektorin e gjelbërimit.

Për të realizuar kompostimin e mbetjeve, Bashkia realizoi me sukses procesin e ndarjes së tyre në burim, nëpërmjet blerjes dhe vendosjes së koshave me kapacitet 240 dhe 120 litrash (në total 100 të tillë) pranë bareve dhe restoranteve të cilët gjenerojnë këto mbetje. Këtij qëllimi i shërbeu blerja e një makinerie kompostimi “Rocket A 900”, e njëjtë me ato që përdoren në vende me standarde të larta në fushën e trajtimit të mbetjeve, (e para e këtij lloji në vendin tonë), e cila u vendos në një ambient të ndërtuar enkas për funksionin e mësipërm. Kjo makineri, ka filluar procesin e kompostimit të mbetjeve organike dhe shume shpejt, produktet e saja do të përdoren për të mbuluar nevojat e bashkisë, në sektorin e gjelbërimit.

Përveç  ndarjes së mbetjeve në burim dhe kompostimit të tyre, realizimi i këtij projekti pati një efekt pozitiv dhe në menaxhimin më të mirë të mbetjeve, gjë që u realizuar nëpërmjet blerjes dhe vendosjes së 100 koshave me kapacitet 1100 litrash në të gjithë territorin e Bashkisë.

Menaxhimi i mbetjeve është një nga sektorët proritarë të punës së Bashkisë, pasi një kontroll dhe menaxhim sa më i mirë i tyre ndikon në cilësinë e jetesës së komunitetit. Në këtë kontekst, Bashkia po punon që ndarjen e mbetjeve në burim ta shtrijë në të gjithë qytetin.

Bashkia Skrapar falënderon të gjithë partnerët vendas dhe të huaj (Qendrën e Menaxhimit të Mbetjeve DIADYMA SA, Qendrën e Kërkimit dhe Teknologjisë Greke CERTH, Bashkitë  Grevena dhe Kastoria, Institutin e Kërkimit Urban në Tiranë URI) për pjesëmarrjen dhe asistencën e vyer në realizimin e suksesshëm të këtij projekti, me shumë interes për komunitetin tonë. Një falënderim të veçantë për stafin e Ministrinë për Evropën dhe Punët e Jashtme për mbështetjen e ofruar në çdo hap të realizimit të këtij projekti.

Me financim të GIZ, po punohet për rehabilitimin e venddepozitimit të mbetjeve në Bashkinë Skrapar. Punimet në këtë objekt, të cilat janë tashmë drejt përfundimit, synojnë jo vetëm zgjerimin në masë të konsiderueshme të hapësirës në të cilën administrohen mbetjet, por edhe pajisjen e këtij venddepozitimi me masa mbrojtëse të cilat zvogëlojnë ndikimin e mbetjeve në tokë, ajër dhe ujë, në funksion të mbrojtjes së  mjedisit dhe shëndetit të banorëve. Falë këtyre punimeve, Bashkia mund të përdorë në mënyrë më të sigurt dhe të kontrolluar venddepozitimin për një kohë të caktuar, deri në gjetjen e një zgjidhjeje më afatgjatë. Punimet rehabilituese në këtë venddepozitim janë pjesë e prioriteteve të Bashkisë sa i takon administrimit cilësor të mbetjeve urbane. Në vijim, Bashkia po harton një projekt të veçantë sa i takon rehabilitimit të venddepozitimit të mbetjeve të ngurta. Bashkia Skrapar vlerëson lart dhe falënderon GIZ për financimin e këtij projekti me shumë vlerë për komunitetin tonë. Një falemderim i veçantë, po ashtu, për Ministrinë e Turizmit dhe Mjedisit për mbështetjen e ofruar në realizimin e tij.

Në  kuadër të bashkëpunimit të frytshëm të vendosur tashmë me kompaninë Trans Adriatik Pipeline (TAP), Bashkia Skrapar ka përfituar së fundmi një automjet zjarrfikës me kalueshmëri të lartë, i cili i është bërë pjesë e kontingjentit të mjeteve në përdorim nga Sektori i Shërbimit të MZSH-së, duke rritur cilësisht kapacitetet e këtij shërbimi.

Sektori i Shërbimit të MZSH-së, do të ketë, kësisoj, mundësinë të përballojë më mirë situatat e emergjencës civile nga zjarret apo aksidentet. Ky automjet, i pajisur me të gjithë artikujt e nevojshëm të mbrojtjes dhe shpëtimit nga zjarri, ju dhurua Bashkisë Skrapar në prag të festave të fund vitit, në një ceremoni, në të cilën ishin të pranishëm  përfaqësues të  kompanisë Trans Adriatik Pipeline, Kryetari i Bashkisë z. Adriatik Mema, si dhe  të gjithë punonjësit e Sektorit të Shërbimit të MZSH-së.

Në vijim, sipas marrëveshjes së nënshkruar mes dy palëve, në pranverën e  këtij viti,  Bashkia Skrapar, do të përfitojë nga Kompania Trans Adriatik Pipeline edhe një mjet tjetër zjarrfikës, i përshtatshëm për  situata emergjente në zonat me reliev më të thyer malor.

Këto automjete i shtohen, kështu, fondit të asistencës së vazhdueshme që TAP ka dhënë për Bashkinë Skrapar ku, ndër më kryesoret, do të përmendnim: ndërtimin e kopshtit të ri në qendër të qytetit, ndërtimin e stacionit të pompave të ujësjellësit të qytetit, rikonstruksionin e shkollës 9-Vjecare Therepel, sistemim dhe asfaltim të disa segmenteve rrugore, ndriçimin e hyrjes së qytetit, etj.

Bashkia Skrapar, përfiton nga rasti t’i shpreh  Kompanisë Trans Adriatik Pipeline dhe stafit të saj menaxherial në Shqipëri, mirënjohjen e thellë për këtë ndihmë të çmuar,  në funksion  të sigurisë së jetës  dhe pronës së banorëve të saj.

Teksa i afrohemi pragut të ndërrimit të viteve, kam kënaqësinë t’ju përcjell të gjithë qytetarëve të Skraparit urimet e mija më të mira për vitin e ri 2022. Uroj që të gjithë të kalojnë një mbrëmje të gëzuar dhe të paharruar me familjet e tyre. Është nder dhe privilegj për mua, si kryetar i Bashkisë, të jem në shërbim të këtij komuniteti të mrekullueshëm. Stafi i Bashkisë dhe i gjithë Njësive Administrative, po ashtu, kanë qenë vazhdimisht në shërbim dhe në përgjigje të kërkesave të qytetarëve.
Pavarësisht, kushteve të krijuara nga pandemia, ky vit ka shënuar progres për komunitetin tonë. Ndër më kryesoret, do të përmendja: ndërtimin e ujësjellësit të ri të qytetit, punimet e të cilit kanë avancuar dukshëm, me synim përfundimin e tij në pranverën e vitit që vjen; ndërtimin e një qendre rekreative në lagjen 5 Shtatori, e cila përveç kushteve çlodhëse që ofron për të gjitha moshat, i ka ndryshuar rrënjësisht pamjen kësaj lagjeje; punime të tjera rehabilituese në brendësi të qytetit; punimet (ndonëse jo në ritmin e duhur) transformuese në qendër të qytetit, në kuadër të rilindjes urbane; punimet në proces për ndërtimin e ujësjellësve në fshatrat Gjerbës dhe Kakrukë; ndërhyrje të dukshme në mirëmbajtjen e infrastrukturës rrugore në disa fshatra, kjo, në disa raste, në bashkëpunim dhe me kontributin e vetë banorëve, etj.
Gjithë sa përmenda më sipër, por jo vetëm, janë inkurajim për ne për të pasur një vit të ri më ambicioz dhe me më shumë progres në të mirë të të gjithë komunitetit tonë.
Dhe ndërsa të gjithë përgatitemi për festën e ndërrimit të viteve, është momenti të kujtojmë dhe të urojmë një vit të mbarë për ato familje, të cilat, për shkak të pandemisë, kanë humbur këtë vit të dashurit e tyre.
Është momenti të urojmë, gjithashtu, ato familje që janë në nevojë, dhe të mendojmë dhe reflektojmë se si t’ju vijmë atyre më mirë në ndihmë, duke dëshmuar kësisoj solidaritetin dhe vlerat tona si komunitet.
Është momenti të urojmë pensionistët, veteranët dhe moshën e tretë si shenjë e vlerësimit, mirënjohjes dhe respektit që shoqëria duhet të tregojë për kontributin e tyre të çmuar, por edhe nevojës për më tepër kujdes ndaj kësaj shtrese.
Të urojmë të gjithë ata fermerë në çdo fshat të Skraparit, që me sakrifica dhe punë të palodhur ndërtojnë të ardhmen e fëmijëve dhe familjeve të tyre.
Të urojmë, ndoshta më të veçantët: fëmijët, nxënësit, studentët. Ata janë e ardhmja e këtij vendi, ndaj sa më shumë të përgatiten sot, aq më të aftë do të jenë për të përballuar sfidat e së nesërmes. Përmes tyre, një urim i përzemërt shkon edhe për edukatoret dhe mësuesit, të cilët me punën e tyre japin një kontribut të pazëvendësueshëm në progresin e shoqërisë.
Dua ta shfrytëzoj këtë mundësi të uroj të gjithë ata që për nga profesioni janë përherë në shërbim të qytetarëve: mjekët dhe infermierët, punonjësit e policisë dhe shërbimit zjarrfikës. Me punën tuaj keni fituar respektin e shoqërisë.
Të uroj po ashtu, punëtorët e ndërmarrjes së shërbimeve publike. Falë punës së tyre, shumë ambiente në brendësi të blloqeve të pallateve po ndryshojnë krejtësisht pamje. Është puna dhe kujdesi i tyre që kemi sot një qytet çdo ditë të pastër dhe të gjelbëruar.
Të uroj të gjithë ata që bëjnë biznes dhe t’ju uroj sa më shumë sukses në vitin që vjen. Me atë çka bëni, me vendet e punës që hapni, ju keni një rol të madh në zhvillimin e komunitetit. Bashkia do të jetë gjithmonë në mbështetjen tuaj dhe së bashku duhet të ndërtojmë një partneritet të shëndetshëm të orientuar drejt zhvillimit dhe progresit.
Të gjithë kemi nevojë për më shumë respekt, dashuri, mirësi, solidaritet dhe mbështetje ndaj njeri tjetrit. Vetëm kështu, do t’i japim kuptim dhe vlerë qytetare bashkëjetesës sonë, për ta bërë Skraparin një vend ku jetohet më mirë për të gjithë, pa përjashtuar askënd.
Edhe njëherë, ju uroj të gjithë banorëve dhe çdo familje, pjesëtarëve të tyre në emigracion, në veçanti vajzave, grave dhe nënave tona, të cilat kujdesen aq shumë për këtë mbrëmje feste: Gëzuar Vitin e Ri 2022. I uroj secilit shëndet, gëzime dhe lumturi në këtë vit që po troket.
GËZUAR!