Author: Eugen

Në prag të festave të fund vitit, Bashkia Skrapar në bashkëpunim me shkollat 9-vjeçare dhe të mesme organizoi një takim me nxënësit e dalluar të këtyre shkollave. Pjesëmarrës në këtë takim ishin 49 nxënës të zgjedhur nga të gjitha shkollat e Bashkisë, prindërit e tyre, drejtuesit e shkollave, mësues, anëtarë  të Këshillit të Bashkisë, etj.

Në fjalën përshëndetëse Kryetari i Bashkisë, u shpreh se: 

“Është kënaqësi e veçantë për mua të jem në këtë ceremoni shumë domethënëse, e cila bën bashkë nxënës të arsimit 9-vjecar dhe atij të mesëm, që pavarësisht klasës që ndjekin aktualisht, i bashkon një indikator: përformanca dhe rezultatet që kanë arritur këtë vit mësimor, por jo vetëm.

Është, po ashtu kënaqësi, të kemi sot këtu edhe prindërit e tyre, të cilët kanë vërtet një arsye të qenësishme të krenohen me atë çka ka arritur vajza apo djali i tyre në vitet e shkollës, si një premisë e sigurtë që ata të kenë, padyshim, një të ardhme më të mirë se ajo e prindërve të tyre sot. Në fund të fundit, kjo është dialektika e shoqërisë”.

Ju jeni e ardhmja e kësaj bote, ju do ta ndryshoni atë. Ju dhe bashkëmoshatarët tuaj do ta bëni Shqipërinë më të mirë, më të begatë”.

Ceremonia vijoi me tej me shpërndarjen e Certifikatave të Vlerësimit si dhe Certifikatës “E ardhmja e qytetit” për 12 nxënës me rezultate të shkëlqyera të  shkollave të mesme.

Të gjithë të pranishmit ndanë emocione të veçanta teksa nxënësve ju dorëzoheshin certifikatat si dhe dhuratat simbolike të përgatitura në këtë rast nga Bashkia Skrapar, duke shprehur vlerësim maksimal për këta fëmijë që i japin më shumë shkëlqim qytetit me rezultatet e tyre. Bashkia Skrapar falenderon Bankën Credins si një nga kontributorët për realizimin e kësaj ceremonie.

Regjistroni adresën e banimit në #eAlbania ose në zyrën e Gjendjes Civile pranë bashkisë. #Adresaime – Çelësi për të gjitha shërbimet publike!

Në sheshin qendror të qytetit të Çorovodës, u zhvillua sot ceremonia e dhënies së titullit “Qytetar Nderi i Skraparit” të Prof.dr Ajli Alushanit.

Dr. Ajli Alushani është një personalitet i njohur, i cili ka dhënë një kontribut të vyer në zhvillimin e mjekësisë, veçanërisht në fushën e kardiokirurgjisë në Shqipëri. Ai ka një karrierë të gjatë, e cila daton që nga viti 1963 dhe deri në ditë e sotme. Më shumë se gjysmë shekulli në shërbim të njerëzve, ditë edhe natë, duke u kujdesuar për ta, duke u dhënë atyre ndihmë dhe trajtim mjekësor. Në ceremoninë e sotme merrnin pjesë kolege të z. Ajli Alushani, akademike, qytetarë të shumtë të Skraparit. Ceremoninë e nderuan me pjesëmarrjen e tyre ish Presidenti z. Bamir Topi, Ministri i Brendshëm z. Bledar Çuçi, Deputeti i Skraparit z. Nasip Naco, drejtues të Prefekturës dhe drejtues të tjerë në nivel vendor.

Në fjalën e hapjes, Kryetari i Bashkisë, z. Adriatik Mema, bëri një përmbledhje të veprimtarisë profesionale, akademike dhe publike të Prof.dr Ajli Alushanit. Ndër të tjera, z. Mema u shpreh se, “një mjeku si ai, sado tituj e dekorata t’i akordosh, përsëri shoqëria i mbetet në borxh për atë çka dr. Ajliu i ka dhënë asaj gjatë gjithë jetës së tij”. Duke ju drejtuar, doktor Alushanit, ai shtoi: “Humanizmi dhe mirësia për ju nuk kanë qenë thjesht një akt apo një veprim, ato kanë qenë mënyra juaj e jetesës. Një jetë si e juaja, e jetuar plot ngjarje profesionale, sociale dhe publike, familjare dhe njerëzore, e jetuar për vete dhe për të tjerët, ja vlen ta jetosh”.

Ceremoninë e përshëndetën kolege të Prof.dr Ajli Alushanisi si: Prof.dr. Arben Baboci, Prof.dr. Veli Zogu, Prof.dr Dritan Shehu, ish Presidenti z. Bamir Topi, Ministri i Brendshëm z. Bledar Çuçi etj.

Me emocione të veçanta u përcoll fjala e Prof.dr Ajli Alushanit, i cili në momentin e marrjes së titullit u shpreh se: “Ky titull nuk është vetëm për mua por për të gjithë qytetarët e Skraparit, të cilët gjithmonë mbeten në zemrën time”. Z. Ajli Alushani falendroj Këshillin e Bashkisë Skrapar për titullin e nderit që ju dha dhe shtoi se pavarësisht moshës, si mjek ai do të bëjë gjithçka të mundur për t’ju shërbyer njerëzve që kanë nevojë për trajtim mjekësor. Kryetari i Bashkisë, gjen rastin të shprehë falenderimet e tij për të gjithë të pranishmit në këtë ceremoni, veçanërisht mjekët e ardhur nga Tirana, të cilët i dhanë kësaj ceremonie vlerë të veçantë.

Në kuadër të bashkëpunimit me institucione shtetërore qendrore dhe lokale, në funksion të njohjes së veprimtarisë së tyre dhe të shkëmbimit të eksperiencës, një grup i Kursit të Lartë të Oficerit (KLO) të Forcave të Armatosura, zhvilloi një vizitë në Bashkinë Skrapar. Në përbërje të këtij grupi ishin oficerë të forcave të ndryshme (Tokësore, Ajrore dhe Detare), oficerë të Forcës së Sigurisë së Kosovës si dhe stafi pedagogjik i Akademisë së Mbrojtjes.

Kursantët u pritën në një takim të veçantë nga Kryetari i Bashkisë, zoti Adriatik Mema, i cili në fjalën e tij vlerësoi rolin e Forcave të Armatosura, të cilat përveç misionit të tyre kryesor, janë angazhuar intensivisht në përballimin e emergjencave civile apo fatkeqësive natyrore. Në këtë kontekst, ai nënvizoi edhe rastet e fundit të bashkëpunimit që FA kanë pasur me Bashkinë Skrapar.

Takimi vijoi më pas me një prezantim të përgatitur nga Bashkia, nëpërmjet të cilit të pranishmit u njohën me organizimin dhe funksionimin e Bashkisë si njësi e qeverisjes vendore, strukturën organizative  të saj, njësitë administrative në përbërje të bashkisë, çështje që kanë të bëjnë me buxhetin e bashkisë, taksat dhe tarifat vendore, investimet e realizuara vitet e fundit, përballimin e emergjencave apo fatkeqësive natyrore, etj.

Ky prezantim u ndoq me shumë interes nga kursantët, të cilët adresuan edhe pyetje konkrete që kishin të bënin me aspekte të tilla si: kapacitetet e bashkisë në mbledhjen e të ardhurave, planet e bashkisë lidhur me promovimin e turizmit dhe mbrojtjes së mjedisit, kapacitetet lidhur me shërbimin e mbrojtjes nga zjarri dhe shpëtimit, bashkëpunimin me organe të tjera sa i takon përballimit të emergjencave civile, etj.

Pas takimit në Bashki, kursantët vizituan kanionet e Osumit, si destinacioni kryesor turistik në Skrapar. Duke shpresuar që kursantët të kenë kaluar një ditë interesante, Bashkia Skrapar shpreh vlerësimin e saj për këtë vizitë shumë domethënëse  të përfaqësuesve të Forcave të Armatosura.

Projekti i Ndërtimit të Ambienteve Rekreative & Restaurimi i Fasadave, në Lagjen “5 Shtatori” Çorovodë, i financuar nga IADSA (Konvertimi i Borxhit Italo-Shqiptar) transformon totalisht lagjen “5 Shatori”, duke e shndërruar këtë ambient në zonën më atraktive të saj. Bashkia Skrapar sapo ka përfunduar me sukses zbatimin e projektit, i cili ka ndikuar drejtpërsëdrejti në cilësinë e jetesës se këtij komuniteti.

Rehabilitimi i ambienteve të jashtme, krijimi i ambienteve moderne shlodhese dhe argëtuese për të gjitha moshat, mbjellja e pemëve dekorative, sipërfaqet e gjelbëruara dhe rikonstruksioni i fasadave të pallateve, ka ndikuar në ndërgjegjësimin e komunitetit qytetar rezident në këtë lagje por dhe atë të larguar, që të investojnë në banesat e tyre, pasi prona e tyre tashmë, nuk është më një pronë pa interes, por përkundrazi merr vlerë.

Banorët e kësaj lagjeje, janë shprehur shumë të kënaqur nga zbatimi i këtij projekti, dhe falënderojnë bashkinë, për seriozitetin dhe këmbënguljen në zbatimin e tij.

Nga ana e saj Bashkia Skrapar, shpreh mirënjohjen dhe falënderimin e veçantë, për donatorin e projektit IADSA dhe stafin e saj si një partner shumë serioz dhe shume i rëndësishëm, mbështetës i disa projekteve në bashki, me impakt të dukshëm dhe të prekshëm për banorët e Bashkisë Skrapar.